Skeletonia Metal Inc.: Megadeth, Bleed From Within @ Manchester Academy 5 JUN 2013

上一次睇Megadeth現場已經係五年前啦... 想當年Evile贏左唔知邊本雜誌搞嘅contest，有得幫手做暖場，佢地首張大碟Enter The Grave先至出左幾個月，而家已經出到第四張，成為新世代鞭笞金屬（Thrash Metal）團嘅領班分子。其實後期仲有好多隊出道，不過比人食左頭啖湯，好難發倒圍咖啦。今次Megadeth黎最主要都係想谷下隻新碟 Super Collider，話哂對上幾隻有Roadrunner照住，賣得幾差都有個譜，Super Collider以自家新成立公司Tradecraft出（不過都揾左Universal跟住），推出兩首singles：Super Collider同Kingmaker都比網民彈到飛起，都咪話唔驚... 其實今個tour題外話仲想讚下HMV，上次差少少汁笠，宜家真係有轉型（唔係話啱啱搞果個summer clearance sale呀，我先無咁短視！），同歌手/band搞多少少簽唱握手會，十零鎊買隻新碟真係無幾多個人會制，但係十零鎊加簽名同握手成件事就唔同哂，HMV有得汁番少少，個歌手又可以推下個銷量，大家都有著數。之前睇外國blog話HMV會放多少少cult原素落貨源度，又真係有做野喎，曼城間HMV齊一套Shameless Screen Entertainment出嘅片，Arrow Videos差咁少少，BFI都算幾齊，88Films真係要入番多少少貨，希望遲下HMV醒水將同廠出嘅放埋一齊，唔好係唔係都跟字母排就好啦！

話說我一朝早起身就去排隊攞手帶，陣間下晝番黎攞簽名，我6:45am去到先得兩個阿叔排緊，問下先知佢地都係早我15分鐘到，等到8點都係得果30個人排緊，對比香港啱啱Top Shop間旗艦店開幕都排餐懵嘅香港人，英國人真係唔鐘排/炒，4年前排Diesel限量牛已經係咁（我排第二咖！幾叻仔...），iPhone/iPad由頭到尾都係中國人排嘅多，下次真係唔洗咁早去... 保安非常好人，8:30am提早放我地入去買碟同攞手帶，等人買完仲趕得切番工。4點幾帶番隻碟番去HMV，已經有30個人排緊（後尾上HMV Manchester個twitter先知去到12點幾都仲未排哂350條手帶...），5點鐘準時開始簽。咁大個仔第一次去簽名會，緊張度出手汗（都唔知緊張乜野...）前面個阿叔帶埋支Dave Mustaine專用Dean Guitar黎諗住搏懵攞簽名，點知最後保安都係唔比，大熱天時孭住支結他都唔講得笑... 由上台，握手，簽名，落台，成個過程唔過一分鐘，不過... 一切都係值得嘅！

喂位阿叔帶埋老婆同個仔一齊黎

Dave爺少有地咁好笑容，可能... 因為信左教？！

隻簽左名嘅碟同手帶

番屋企放低隻碟就起程去Academy，自從佢裝修完都未入過去，唔知堆音響掂唔掂，上次去仲用緊舊果堆真係幾差，所有聲都撞到七彩，solo位聽唔清，Dave爺把聲更加唔多聽倒，今次點差都一定差唔過上次掛？早左2個鐘去排，豈有此理，今次反而有40幾人排緊，今日企足大半日都企唔倒最前排，搞錯！遲左足足廿分鐘先入得場，一入到去guest band都差唔多開始玩，仲有好多人都未入倒黎。之前無聽過Bleed From Within，淨係知由蘇格蘭黎，玩Metalcore，啱啱出第三隻碟，無論台上又跳又叫，台下丁點反應都無，講真，會聽Megadeth嘅都唔多好core band，唔明點解organiser成日都鐘意請唔同類型嘅做暖場，唔做好過做啦... 其實BFW都玩得唔錯，不過聽網上班core迷講話佢地抄The Black Dahlia Murder，唔知咁多啦，我連TBDM都未聽過... 可能係遲左開場關系，玩左三首就完（定係反應太差？），陰公，佢地set個台仲耐過上台玩果三首歌...

Megadeth上場唱頭幾首歌發覺音響係好左，但調教上好似出左問題，bass同鼓聲好出，但係Chris支lead guitar唔係好聽倒，Dave爺把聲仲大鑊，一到chorus位真係聽唔倒咁滯。同埋唔知點解Countdown To Extinction個Chorus Dave爺個pitch怪怪地，但係無理由首歌唱左十幾年會揾唔倒個pitch假... 卒之唱完第六首Architecture Of Aggression成隊band入番後台，David Ellefson出黎話有technical 加燈光問題叫大家等下，等左十幾分鐘先至出番黎。中途有幾個傻佬飲大左喺度boo，真係多得佢唔少，Dave爺出黎鬧果幾條友，幾驚佢話腰斬... 整完真係好好多（心理上？其實到宜家都唔知整左乜），之後一連玩左幾首Rust In Peace同Countdown To Extinction年代嘅歌，成晚先玩左三首新碟歌（對我地真係好人呢！）。可惜時間有限，好幾首名作如Wake Up Dead，In My Darkest Hour，Tornado Of Souls都無，不過佢地名作咁多，邊玩得哂呢？